كتابك لسه أوراقه
مريض بمشاعرك الخضرا
بتكتب كلمه من عقلك..
وباقي الصفحه من قلبك..
دا حتی النوم..
أنا الحلم الطويل الحلو..
وانا الضَّيّ اللي ماشي وراك..
وقدامك..
في صحوك برضه ومنامك..
وانا نهاية الوصول دايما
وانا خطوك و(أقدامك)..
أنا حافظاك..
بتضحك قبل قولة آااه ما تسرق منك الهيبه
ولو شافوا البشر وجعك
تحس ان انت ف مصيبه
عيوبك كلها ف جيبي
وجيبك خالي م العيبه
هتهرب فين؟
أنا مرايتك ومواعيدك..
أنا اللي بتسألك دايمًا:
هتلبس إيه؟
ورايح فين؟
ومين بصت عليك يا جميل؟
هتهرب فين؟
دا انا أمك وابوك واختك..
أنا اصحابك وانا بختك..
هتهرب فين؟
وتهرب ليه؟!
يجوز نزعل..
ونتخاصم..
يجووووز طبعا..
لكن أحيا بدونك يوم؟
لا يمكن قلبي يستحمل!
صبرت عليك..
وطال صبري..
أنا لو جنبي ألف جميل..
بشوفك دايمًا الأجمل..
أنا قلبي ما شاف غيرك..
وقلبك جالي مستعمل..
هتصحی ازاي بدون إزعاج مكالماتي؟
وقل لي ازاي هيمشي اليوم؟
كمان قل لي:
علاجك مين يتابعك فيه؟
ومين هايتابع الدكتور؟
مسيرك يوم هترجع لي..
لأن كتابك المفتوح..
مريض بمشاعرك الخضرا..
بقلم / آية رفعت دياب
