(عن رياضة الكونغ فو )
بقلم /#رانيا_صلاح
الكونغ فو هي رياضة تعتمد علي المهارات القتالية أخذت لدى الأساتذة كثيراً من التعاريف التي تعتمد على خبرات ووعي وتركيز وإدراك كل منهم للكون إلا أن الكلمة إذا أردنا أن نطلق عليها تعريف وهو أسلوب له شهرة تعني الوقت والجهد والتمرين ذو مردود إيجابي لكل من الرجال والنساء والاطفال، والذي يساعد على تكوين العضلات و بناء جسد رشيق قوي، وعقل
مدرك وواع وروح متزنة.
بدأت ممارسة الكونغ فو بداية لدي طائفة الطاوية في القرن الخامس قبل الميلاد لها اساليب وانماط عِدة وده اللي هنتعرف عليه باستفاضة مع الكابتن خالد احمد معروف مدير اكاديمية x-fight academy
مواليد محافظة الاسكندرية ذات اصول صعيدية تحديدا محافظة الاقصر الجميلة ، وُلد في شهر اكتوبر سنة85 تخرج من آدارة اعمال جامعة الاسكندرية .. سافر لاماكن كتيره زي لبنان وروسيا والاردن واحترف بلعبة mma بجانب احترافه ودراسته للكونغ فو يسعدنا انه يكون معانا في حوار شيق وحصري لجريدة الاخبار المصرية يعرفنا اكتر علي نفسه وعلي رياضة الكونغ فو بوجه عام
١- ليه اخترت رياضة الكونغ فو بالتحديد وبقالك قد ايه بتلعبها وازاي جاتلك فكرة تكوين أكاديمية لتعليمها ؟
رياضة الكونج فو مختلفة عن اى رياضة تانية فيها دفاع عن النفس باليد و المصارعة و الركل غير اللعب التانية الاستعراضية أو اللى فيها لعب باليد فقط أو القدم فقط، لعبة ممتعة جدا بتعودك تدافع عن نفسك تحت اى ظرف و فيها هدوء و سلام نفسى و ثقة فى النفس كبيرة جدا
كنت بمارس ألعاب دفاع عن النفس من سن ١٠ سنين و مارست ألعاب كتير بس اللى شدنى للكونج فو الحاجات اللى اتكلمت عنها.
– فكرة تكوين الأكاديمية لتعليم رياضات الدفاع عن النفس و الكونج فو بالأخص فكرة جاتلى من كتر حبى للتمرين و ممارسة الرياضة و حبيت اني انشر رياضة الكونج فو بطريقة جميلة و محترمة علشان فى بعض المدربين أساءت استغلالها و بقت عبارة عن ربح مادى فقط و ميهمهمش أنهم يعلموا الطفل.. اهم حاجة بتبقي عندهم أنهم يخلو الطفل اطول وقت عندهم و يخدو منه فلوس ومافيش اهتمام طبعا بالجانب النفسى و لا التعليمى و دى حاجات مريت بيها مع المدربين و حبيت اغيرها مع مرور الوقت.
٢- ازاي الكونغ فو ممكن تكون رياضة بتفرق في نفسية الاطفال وممكن الاطفال يتدربوها من سن كام لكام سنة؟
الرياضة مرتبطة بالنفسية جدا و علاقة الطفل بالمدرب و ازاى يحببه فى اللعبة دى مهمة المدرب أنه ازاى يخلى الطفل واثق فى نفسة و المراحل اللى بيعدى بيها فى المدرسة متكونش سلبية علية و يعرف ازاى يتصرف لو اتحط فى مواقف معينة.وبيبدأوا من سن اربع سنين.
٣- ازاي من خلال رياضة تعتبر عنيفة شوية زي ما البعض بيتداول عنها زي الكونغ فو ان الطفل ممكن يدافع عن نفسه بدون ما يكون عنيف ويترجمها لعنف في تعاملاته؟!
– دور الأمهات دور مهم جدا فى أن هى تخلى الطفل يمارس رياضة و يبعد عن العادات السيئة علشان الطفل فى السن الصغير بيكتسب عادات سواء من الشارع أو المدرسة أو البيت أو الأقربين فى منها الوحش و فى منها الكويس بس ديما الوحش هو اللى منتشر للاسف و دة دور الأسرة فى متابعة طفلهم و ازاى يوصلوه لبر الامان ، والنشأة الصحية الدينية الرياضة مهمه جدا لاي طفل
دور المدرب هنا ازاى يخلى الطفل يعرف يتحكم فى نفسة و ميخليش حد يغلس علية وازاي يتعامل مع اي حد او اذيه من غيره بيتعرضلها و ميستخدمش اللعبة فى اذية غيرة ابدا و يدافع بيها عن نفسة و عن غيرة.
٤- ايه الفرق بين رياضة الكونغ فو وبعض الرياضات الاخري زي الجودو مثلا والكاراتية والتايكوندو ؟ ليه الناس دايما عندهم خلط ما بين الرياضات القتالية دي لو تقدر تقولنا الفرق بينهم بيختلفوا عن بعض في ايه؟
-الفرق فى الالعاب القتالية
بيبقى كتير زى طرق اللعب و القوانين علشان كدة الكونج فو متربعة على العرش فى رياضات الدفاع عن النفس غير الجودو و التايكوندو و الكراتية
بس لما يكبر ويتعلم الكونج فو حيبقى بارع فى الجودو .
الكونج فو فيها سرعة وخفة و رشاقة و مرونة
وكل دة فى كل الرياضات بس الكونج فو حتنمى اكتر التفكير ودى اكتر حاجة بيستخدموها فى الجودو و المصارعة
يعنى لو حطينا لاعب كونج فو فى اى موقف حنلاقية عكس بتاع التايكوندو مش بيلعب الا بالرجل فقط
حنلاقية بيلعب ب ايدة و رجلة و بيستخدم طرحات مصارعة و جودو موجودة فى الكونج فو.فنقدر نقول ان الكونغ فو بيبقي شامل اغلب الالعاب التانيه اللي ذكرناها.
٥- هل الفترة الجاية في مسابقات او بطولات هتشارك فيها الاكاديمية الخاصة بيك؟! وهل رياضةالكونغ فو عموما بتدخل بطولات سنوية ولا كل قد ايه؟!
– لعبة الكونج فو لها اتحاد رسمى
و بنشترك فى جميع البطولات الرسمية و التنشيطية و اللقاءات الودية بين الفِرق و اختبارات الأحزمة و اختبارات تحديد المستوى كمان و بنأهل اللاعب نفسياً و بدنياً و مهارياً لكل بطولة علشان كل بطولة ليها أجواء مختلفة و مرحلة مختلفة و محتوى تدريبى مختلف ووحدة تدريبية مختلفة مع اختلاف المراحل السنية طبعا ..والبطولات بتبقي طول الموسم الرياضي .
٦- ايه اهم البطولات اللي حصل عليها الكابتن خالد معروف سواء محلياً او دولياً مع الاطفال؟!
-على مستوي جمهورية مصر العربية اخدت مع بعض اللعيبة بطولات جمهورية و بطولات أندية و مناطق. و اللعيبة دى بيتعملها اعدادات مختلفة لكل بطولة
أما بالنسبة للبطولات الدولية ف احنا بنسعى جاهدين لتحقيق ذلك سواء على مستوى اللاعبين الكبار أو الصغار من المراحل السنية المختلفة و من الجنسين أيضا.
٧- هل رياضة الكونغ فو تصلح ان حد ممكن يتعلمها في سن كبير زي بعض رياضات زي التنس وبعض المهارات زي الرسم مثلا باتري كونغ فو زيهم ولا لا؟؟
السوال دة له معانى كتيرة قوى
تعالوا نتفق أن الرياضة عموما ملهاش سن معين أو محدد
بس هنا اللى جاى يتعلم عندة كام سنة! وهل بيعانى من امراض فى العظام ولا التنفس! دى حاجات بتتحط ديماً فى الاعتبار بس رياضات معينة فى الدفاع عن النفس للاعمار الكبيرة هى اللى ينفع يتدرب عليها أو يتعلمها فى سن كبير زى الجودو و الايكيدو و الونج تشن و السلف ديفنس ضد السلاح بس انا برشح السباحة مع اى لعبة من دول لكبار السن .
و السباحة مع الكونج فو أو اى لعبة دفاع عن النفس لصغار السن بيعمل منه لاعب لا يقهر بجد.
٨- ايه المقومات اللي لازم تكون موجودة في شخصية او دراسه محدده لاي مدرب للكونغ فو للاطفال؟!
لازم يكون شخصية قيادية وعنده قدرة علي الأقناع وعنده ثقة بالنفس ويعرف ازاي يدرس المشكلة ويحلها .ويكون متفائل ومحافظ علي صحته وقوامه الرياضي، وعلاقتة مع اللعيبة وأولياء الامور والمجتمع المحيط به لازم تكون كويسه ويكون لبق مع الجميع يمتلك ذكاء اجتماعي. وطبعا لازم يكون عنده احترام للاعبين ومهتم بنضافتة الشخصية وقارئ في مجاله وصبور للتعامل مع الاطفال وصادق .
٩- مين اكتر شخص شجعك علي اللعبة دي وانك تحترف فيها وايه الصعوبات اللي واجهتك ان تكمل طريقك فيها؟!
اكتر حد شجعني ع العبه دي واني احبها واكمل فيها الكابتن احمد عبد الجواد كبير المدربين من اسكندرية لقيت فيه كل المقومات اللي اتكلمت عنها وفي كمان كابتن نبيل النجدي ومصطفي كمال الفيومي من القاهرة وكمال الجزار واحمد الشامي وناس كتير كان ليا حظ وشرف اني عرفتهم واتعلمت علي ايديهم وكان ليهم فضل كبير عليا..كانوا سبب في ان كابتن خالد معروف موجود دلوقتي?.
اخيرا قولنا نصيحة منك لاي شاب في عمرك متردد انه يلعب رياضة اصلا او عمره مالعب رياضة معينة او يحدد هو عايز ايه في حياتة ونصيحتك ايه للاطفال الصغيرين اللي لسه في مرحله النشأ؟!
-نصيحتي لاي شاب تتخلص في اربع جمل قصيرة
بر اهلك
ارضي ربك
مارس رياضتك
ابعد عن كل حاجه وحشه..
لازم يبقي عندك هدف في حياتك تجاهد علشان توصله .
لو حبيت الرياضة اللي حابب تكمل فيها وقررت ده لازم تدرسها بكل حاجة فيها واقرأ كتير علشان دايما تتكلم عن وعي وفهم وخليك دايما متطلع وقارئ .
في نهاية حوارنا احب اشكر جدا كابتن خالد معروف والشكر لاكاديمية x-fight academ
وبنتمني ليك كل التوفيق ومزيد من النجاح علي كافة المستويات?
يجب عليك تسجيل الدخول لاضافة تعليق.