بخاف …علي حلمي وحلمك
علي كل أمل بقا جنب اخواته
محلك سر دوره مجاش
بخاف .علي
ماضي راح بسعر بلاش
وكل يوم كأنه سنين عجاف
واصبر نفسي بحاضر
ملامحه تايها و مستقبل
في علم الغيب لسه
ما تشاف…….
بخاف …من المرض
يا تري لو جاني هيلاقوا الدوا
ولا هيقولوا لسه مخترعناش
بخاف ….
بخاف اغرق في شبر ميه
وأصرخ يسمعوا الندا
ويقولوا ما سمعناش
بخاف….. اكلم الناس
ناس تقول فهمنا الكلام
وناس تغير المعاني
وناس تقول مفهمناش
بخاف …
بخاف اكون واضح صريح
يقولوا مالك بقيت جارح
ولو كنت يوم في حالك
يقولوا متكبر صحيح
بخاف ….احلم ببكره
يطلع زاي امبارح
أو يطلع كابوس
زاي الحجر ع الصدر
ما ينزاح …..
بخاف علي…..
ابني وابنك اللي جه
أو لسه مجاش
هيكون حظه زاي حظنا
ولا هنتندم في يوم
ونقول ياريته مجاش
بخاف….
يجب عليك تسجيل الدخول لاضافة تعليق.