أسماء فرحات تكتب أمي

أمي لو في قفة عاوزها، أمي عندي أغلى الناس، ده ريح الجنة في ريحها، والحنان كله في عيونها، وخير الدنيا في كفوفها، ببركة دعاها، الستر معشش على بيوتنا، أمي لو في قفة عاوزها، وأنول رضا ربي برضاها، ده أنا عايش مسنود على دعاها، ، والرحمة في حياتي لمحياها، أمي لو غابت عني يوم، تغيب روحي وياها، أمي قوليلي أنا حتة منك ولا أنتي يا غاليةحتة مني، أمي دي بألف راجل، أمي يا نور عينيا، أنا ماشي عدل لأجل تتباهي بيا، ويقولوا الناس صفية عرفت تربي، أمي لو في قفة عاوزها، لحد أمتى هتشيلي فوق كتافك همومنا، أرتاحي يا أمي كفاية. أمي همومنا أترسمت على وشها. أرتاحي يا أمي كفاية، طول عمر أمي جبل، بس الجبل بان عليه العجز والكبر ، قالوا أمك مريضة يلزمها حكيم ودوا، قلت ده هي كانت الدوا، كان كل جرح فيا يطيب، أول ما أتبارك برؤياها، جبت ألف حكيم، قالوا ما في لمرضها دوا، قلت لطفك يا رب. لطفك يا رحيم، كنت أخدها في حضني وتداري الأه جواها، أمي أحن منها ما فيش، لو سقطت منها دمعة غصب عنها تقولي يا بني ده عرق، أصل حضنك دفا، شايلة همي حتى يا أمي في تعبك، أنا طول عمر أمي جبل، أمي كان يختشي الورد من جمالها، وما أختشى المرض وهو بين عظامها، أمي يا ريتني كنت أنا، قالتلي ألف بعد الشر عنك يا أبني. أمي روحي فداكي، أوعي تمشي وتسيبيني، دي سنة الحياة يا بني، الله يخليك لأولادك. أمي أمي ،أمي لو في قفة عاوزها، طابت روحك يا أمي يا من جعلتي حياتي طيبة.شفتي يا أمي صفية الصغيرة حتة منك فيها من حنان قلبك ومن طيبتك. سميتها على أسمك لأجل ما ينقطع من البيت أسمك. أمي لو في قفة عاوزها. دي الرحمة في حياتي لمحياها.ألف رحمة ونور على روح كل أم غالية.