الشيف / منيرة راشد
حمااااام 🔥يا عشاق الحمام
هقولك ازاى يطلع سليم من غير ما يضرب أو يخرج الأرز بتاعه … ويا سلااااام على الأرز المفلفل المبهر الخطييييير💥
🌺🌺🌺🌺🌺🌺🌺🌺🌺🌺
الطريقة :
نضع كبد وقوانص الحمام بدون ما اقطعها فى ماء يغلى ونضع عليه خل … ثوانى بس يغير لونه واشيله على طول وبعدين هقطعه قطع صغيرة …
الخطوة دي عشان الكبد والقوانص تبقى مافيهاش أى زفارة أو مرارة ...
نضع كوب ونصف أرز وعليهم كوب ونصف ماء ونضعهم على نار عالية بدون ما نغطى الحلة … وأول ما يغلى والماء يتشرب هطفى على طول ….
هنقطع البصل قطع صغيرة جدا حوالى بصلتين متوسطين … وبعدين نضع ملعقتين سمن كبار عليهم ملعقتين زيت كبار فى طاسة على النار وننزل عليهم البصل ونقلبه حتى يذبل من غير ما ياخد لون
وبعدين ننزل عليه الكبد والقوانص ونشوحهم معاه ونضع ملح وفلفل اسود وبهارات والقليل من القرفة ونشوحه تشويحة بسيط وبعدين نرفعه من على النار …
نضع الخلطة دي على الأرز وناخد بالنا اننا مستخدمين كمية سمنة وزيت مع تشويح البصل والكبد مضبوطة عشان الأرز يطلع مفلفل …
وبعدين هنحشى الحمام بدون خياطة
( الحمامة بتاخد تقريبآ ربع كوب أرز أو أزيد حاجة بسيطة )…
الحمام هيقفل لوحده على النار زى الممبار ..
وبعدين نسلقه فى ماء يغلى مضاف لها طماطم وبصل وجزر وملح وفلفل و ورق لورا … مدة السلق ساعة الا ربع …
وبعدين هنعمل الصوص …
ملعقتين زيت وملعقة سمن على النار نضع عليهم ٢ طماطم مبشورة وملح وفلفل اسود وبهارات وبصل بودر وتوم بودر وبابريكا ورشة قرفة ونصف ملعقة سكر وعصير نصف ليمونة …
وأول ما يغلى هدهن بيه الحمام وادخله الفرن تحت الشواية ثوانى …
خدى بالك ثوانى من كل الاتجاهات هياخد لون وطعم جميل من غير ما لحم الحمام ينشف زى ما بنقليه …
وبألف هنا على قلبك يا جميل ❤
