الشيف / منيرة راشد
😊صنية البطاطس بالفراخ😊
😊المقادير😊
🔸️فرخه متقطعه
🔸️كيلو بطاطس
🔸️اتنين كوب من عصير الطماطم
🔸️معلقه من الفلفل الاسود والتزم البودر والبصل البودر
🔸️وتوابل الفراخ والببريكا معلقه توم مهروس واتنين بصله
🔸️فلفل اخضر وقرن شطه حامي ودا حسب الرغبه
🔸️ماده دهنيه زبده او زيت او الاتنين مع بعض
😊الطريقة😊
🔸️هنعمل محلول نقع الفراخ عبارة عن🔸️
واحد لتر مايه وندوب فيه معلقتين ملح ومعلقتين سكر
شرائح ليمون وننقع الفراخ في المحلول لمدة ساعة على الأقل
هتنزل أي حاجه غير مرغوب فيها في الفراخ
نرجع للبطاطس هنقشرها ونغسلها كويس نقطعها طرنشات
هنخرج الفراخ من محلول النقع نديها غسلة تحت الماية ونشفها
هنجهز طاسة بقى فيها معلقة زبدة وزيت وننزل واحدة واحدة بقطع الفراخ ونديلها وش صدمة على تحمير
نرش توابلنا واحنا بندي الصدمة دي على النار
خلاص خلصنا الكمية منرميش مكان الفراخ لا هنكمل في نفس الطاسه علشان ناخد من طعم الفراخ
هننزل بالبصل اللي قطعناه طرنشات وبعدين التوم
ولما ياخدوا وش ننزل بعصير الطماطم ونظبط الملح
أول ما صوص الطماطم يبتدي يغلي هنشيل كوبايه
من الصوص ده على جمب وهقولك دلوقتي ليه 😅
وبعدين نضيف البطاطس في باقي الطماطم تاخد أول غلوة على النار وبعدين نطفي النار
يلا بقي نجهز الصنية اللي هندخلها الفرن
هنضيف تحت البطاطس اللي أخدناها غلوة واحدة
وبعدين هنرص فوقيها الفراخ وقطع الفلفل وطرنشات بصل
وبعدين نضيف كوب الطماطم اللي أخدناه على جمب
الفرن سخن طبعاً هنحط صنية البطاطس على آخر رف في الفرن ونسيبها ساعة على درجة حرارة 180
واثقه إنكم هتاكلوا أحلى صنية بطاطس بطعم يرجعك لخيرر زمااااان 😅
وبالهنا❤️😘
