قفص العصافير من غير أبواب
ولكنه عليه مليون بواب
شايلين نبابيت معجونه ف زيت
مخلوط بدموع قلب الأحباب
فازاى هطير منه العصافير
وتعيش أحرار فوق أعلى سحاب
وازاى هيصير ف الكون تغير
والشر.. بمليون ضرس وناب
قفص العصافير سٍجن وسجان
وحيطان بعيون لكن عٍميان
مش قادرة تشوف مين اللى اتهان
ولا حاسه بمين عايشين أغراب
فازاى هتدوق عصافيرنا الزاد
وتغرد فوق شجر اللبلاب
ف زمان مافيهوش غير الأوغاد
وحدادى مايملا عيونها تراب
قفص العصافير مليان غربان
وعليه سجان زى التعبان
مش راضى يفوتها تعيش ف أمان
وأمانه لطيرنا الحُر عذاب
كل العصافير رافضة التطبيع
مع ديب مسؤول عن دم رضيع
كان حلمه يشوف الدنيا ربيع
ويعيش ف بلاده مع الأحباب
رضا أبوالغيط
يجب عليك تسجيل الدخول لاضافة تعليق.